domingo, 24 de junio de 2012

Campanas de Bastabales

Campanas de Bastabales,
cando vos oio tocar,
mórrome de soidades.
                       
 
              I
Cando vos oio tocar,
campaniñas, campaniñas,
sin querer torno a chorar.
                       
 
Cando de lonxe vos oio
penso que por min chamades
e das entrañas me doio.
                       
 
Dóiome de dór ferida,
que antes tiña vida enteira
e hoxe teño media vida.
                       
 
só media me deixaron
os que de aló me trouxeron,
os que de aló me roubaron.
                       
 
Non me roubaron, traidores,
¡ai!, uns amores toliños,
¡ai!, uns toliños amores.
                       
 
Que os amores xa fuxiron,
as soidades viñeron...
de pena me consumiron.
                       
 
              II
Aló pola mañanciña
subo enriba dos outeiros
lixeiriña, lixeiriña.
                       
 
Como unha craba lixeira,
para oir das campaniñas
a batalada primeira.
                       
 
A primeira da alborada
que me traen os airiños
por me ver máis consolada.
                       
 
Por me ver menos chorosa,
nas suas alas ma traen
rebuldeira e queixumbrosa.
                       
 
Queixumbrosa e retembrando
por antre verde espesura,
por antre verde arborado.
                       
 
E pola verde pradeira,
por riba da veiga llana,
rebuldeira e rebuldeira.
                       
 
              III
Paseniño, paseniño
vou pola tarde calada
de Bastabales camiño.
                       
 
Camiño do meu contento;
i en tanto o sol non se esconde
nunha pedriña me sento.
                       
 
E sentada estou mirando
como a lua vai saíndo,
como o sol se vai deitando.
                       
 
Cal se deita, cal se esconde
mentras tanto corre a lua
sin saberse para donde.
                       
 
Para donde vai tan soia
sin que aos tristes que a miramos
nin nos fale nin nos oia.
                       
 
Que si oira e nos falara,
moitas cousas lle dixera,
moitas cousas lle contara.
                       
 
              IV
Cada estrela, o seu diamante;
cada nube, branca pruma;
triste a lúa marcha diante.
                       
 
Diante marcha crarexando
veigas, prados, montes, ríos,
onde o día vai faltando.
                       
 
Falta o día e noite escura
baixa, baixa, pouco a pouco,
por montañas de verdura.
                       
 
De verdor e de follaxe,
salpicada de fontiñas
baixo a sombra do ramaxe.
                       
 
Do ramaxe donde cantan
paxariños piadores,
que ca aurora se levantan.
                       
 
Que ca noite se adormecen
para que canten os grilos
que cas sombras aparecen.
                       
 
              V
Corre o vento, o río pasa.
Corren nubes, nubes corren
camiño da miña casa.
                       
 
Miña casa, meu abrigo,
vanse todos, eu me quedo
sin compaña nin amigo.
                       
 
Eu me quedo contemprando
as laradas das casiñas
por quen vivo sospirando.
                       
..............................                        
Ven a noite..., morre o día,
as campanas tocan lonxe
o tocar do Ave María.
                       
 
Elas tocan pra que rece;
eu non rezo que os saloucos
afogándome parece
que por mín tén que rezar.
                       
 
Campanas de bastabales,
cando vos oio tocar,
mórrome de soidades.
                       

Rosalía de Castro: Cantares gallegos (1863)

Versións:
Amancio Prada: Campanas de Bastabales (Pista 1);



Paseniño, paseniño (Pista 8);



Corre o vento, o río pasa (Pista 12); Rosalía de Castro; 1975; Pistas 1, 8 e 12



Amancio Prada: Campanas de Bastabales (Pista 7), Paseniño, paseniño (Pista 5);Canta a Galicia; 1986; Pistas 5 e 7

(Reedición das versións do disco Rosalía de Castro do ano 1975)



Xistra: Corre o vento, o río pasa; Temporal; 1989; Cara B, Corte 3



Amancio Prada: Campanas de Bastabales (Pista 12);



Paseniño, paseniño (Pista 13);



Corre o vento, o río pasa (Pista 15); Trovadores, místicos y románticos; 1991; Pistas 12, 13 e 15



Amancio Prada e María del Mar Bonet: Campanas de Bastabales (Pista 1);



Paseniño, paseniño (Pista 2);



Corre o vento, o río pasa (Pista 4); Rosas a Rosalía; 1997; Pistas 1, 2 e 4



Amancio Prada: Campanas de Bastabales (Pista 7);



Paseniño, paseniño (Pista 8);



Corre o vento, o río pasa (Pista 10); Rosalía siempre; 2005; Pistas 7, 8 e 10



Amancio Prada: Campanas de Bastavales (Pista 3);



Paseniño, paseniño (Pista 4);



Corre o vento o río pasa (Pista 5); Resonancias de Rosalía; 2014; Pistas 3, 4 e 5



Tempo catro sexteto: Campanas de Bastabales; Os ollos que falan; 2014; Pista 3

No hay comentarios :

Publicar un comentario