domingo, 15 de octubre de 2017

Foliada

Como bandada de pombas
voan os meus pensamentos:
todas levan un camiño,
o camiño do teu peito.

Ti eres o vento
e eu son a folla:
non sopres, vento, ventiño,
si non queres que me mova!

Nin me digas que son triste,
nin me digas que estóu ledo:
risas e bágoas son túas,
e non son máis que un espello.

Ti eres a neve
e eu son o gromo:
non caias na miña ponla
porque si me bicas morro!

En onde ti pos os ollos
o amor pon o seu berce;
en onde ti pos as mans
nacen as rosas a feixes.

Ti eres o lume
e eu son a leña:
non sopres, vento, ventiño,
si non queres que me encenda!

Ramón Cabanillas: Vento mareiro (1915)

Versións:
Aurora López e Teresa Luján: Foliada; Saloucos. 15 poetas da terra nai; 1999; Pista 4

No hay comentarios :

Publicar un comentario